據說office換水係一場心理戰，想飲啖水都要識攻心計。有些打工仔一見水機快無水，實行避開Pantry，免得被同事叫去換水；有些則見機行事，一聽到水機有異動，開始有水咕嚕咕嚕在流動，就馬上衝出去霸頭位斟水。Recruit近來都收集到不少讀者和網民意見，今次實行集思廣益，分享拆解換水問題的招數。
索性唔飲
Hoi Yee：「我有啲同事因唔想換水，寧願日日落街買汽水！」
Oscar Man：「我自己就唔會用公司咖啡機或飲水機，因為真係覺得好污糟，諗下部機入面究竟有多少年冇洗！」
Yosira Mi：「喺屋企自己煲好過，見有啲人係會塞個即棄膠樽個嘴入出水位，諗真啲污糟到爆！」
Chloe Lee：「我都見過呀，好多同事斟水都將個水杯或者膠樽個嘴貼近出水位！但唔通要自己孭水返公司？我又唔想日日買水。」
Wing Yan：「我只飲支裝水，因為覺得水機好污糟，見過有啲黑色點點行嚟行去，又冇人搞搞佢。」
自己／搵人搞掂佢
Irene Tang：「辦公室好多自私精，識飲唔識換！之前做office嘅時候會同個姐姐一齊夾手夾腳換水。」
Gigi Wong：「有啲同事去到見冇水就轉身走咗去；亦有啲女同事次次都只叫同一個男同事去換，俾我都嬲啦！」
Cherry Leung：「其實見到冇水就換㗎啦，飲杯水都諗咁多嘢？」
Wan Wan：「我見到冇水會開定啲樽蓋，再有禮貌咁叫附近求其一位男同事幫手抬上水機，so far都冇問題。」
Fanny Tang：「我舊公司個上司好好人，佢一見到冇水就去換，好勤力！」
上流水機
Shirley Vong：「換咗上流水機之後，我就好樂意換水，因為唔多使用力，舊款水機我真係冇力托囉。」
William Tong：「我公司以前都係咁，之後換成底下抽水式水機，咁就一天都光曬。」
係管理問題
Kwok Kit：「可以睇到間公司怎樣管理，連水都可以冇人去負責換。」
Ripdeep Lam：「不如公司設立一個獎金，邊個換水可以有廿蚊現金獎。我保證啲人爭住換。」
想呻吓？投稿啦！
工作上總會遇到奇趣事、開心事、傷心事、勞氣事、冤屈事，Recruit提供一個讓你分享和抒發情緒的平台。若有職場事想開心share或覺不吐不快，不妨以筆名投稿到 editorial@recruit.com.hk 與大家分享，投稿人資料絕對保密。