在街上、在機場，甚或在地盤，你或會看見他們。縱使膚色或族裔不同，他們與大家一樣，在這個城市成長和打拼，朝早會急急腳趕返工，搭扶手電梯會自動企右邊，食晏會去茶餐廳叫常餐A凍奶茶。就業市場裡，有一群土生土長少數族裔，與你我身處同一天空下，他們的經歷和挑戰，你又有興趣知道嗎?就業多元共融，由了解開始，且聽聽他們的故事。

印裔棟篤笑藝人阿V：人人有段故事　招聘請了解「story」

阿V（Vivek Mahbubani）濃眉深目、高鼻子，下巴留著一撮「羊咩鬚」，他說自己是個「會開廣東話騷的印度佬」，而且百分百「香港製造」。訪問一開始他說道：「我同其他香港人一樣，做嘢追求快靚正，行路好急冇耐性，搭扶手電梯如果見到有人企左邊擋路我會有啲唔耐煩。對我來嚟講，『香港人』係一種態度，唔係以種族區分。」

「我嘅母語係廣東話，印度話反而好渣！」阿V說得一口流利廣東話，皆因父母當年特意為他鋪路。「阿爸阿媽覺得既然我喺香港成長，學識廣東話比較著數，就算去茶餐廳都識叫常餐，於是安排我同家姐入讀主流學校。讀小學時，我半句廣東話都唔識，唯有硬住頭皮學，今日學講『你好嗎？』，聽日再學『不如一齊打波吖？」，慢慢可以同同學有傾有講。」

無意中站上棟篤笑舞台

阿V小學有學中文，但到中學轉讀法文。「每10個中文字，我大約識6個，如果唔識我會查，再寫返拼音上去就ok啦。」圖為他當年與拔萃男書院同學合照。

那時他心想，明明自己有一技之長，可如何跨越障礙呢？「後來想到可自己接job，幫客戶設計網頁，全程用電話電郵溝通，客人聽到我講廣東話，個名『Vivek』又潮潮哋似英文名，以為我係華人，直到交貨後，客約我見面才知我係印度人，佢似乎覺得有啲意外，但好滿意我工作，之後仲介紹其他客俾我，而我後來亦繼續接job。」

生性樂觀的阿V，不時愛搞笑，當年無意中在報章發現棟篤笑比賽，於是抱玩樂心態一試，結果奪廣東話賽事全場冠軍，翌年再參加英語組比賽亦奪冠。這下才忽然發現，自己的印度人身分竟成為吸引觀眾的亮點，他可用笑來化解歧見。「大家覺得印度人crossover廣東話，睇落幾有趣，想睇下我講咩，而且我唔係亂咁講，係認真地搞笑，希望帶俾人歡樂。我試過喺酒吧同餐廳做棟篤笑，雖然冇人工，但可免費食一餐，後來陸續有人搵我做司儀、演講、開騷，收入都唔錯。」他其後索性全職做棟篤笑，2018年更獲選香港傑青。

僱主揀人「story-based」

阿V說自己思想行為很「香港」，但內心深處仍樂於擁抱印度。「我很清楚自己不是華人，家中保留印度傳統，沒跟隨中國習俗，例如農曆新年不會拜年逗利是。不過呢，如你派利是俾我，我都會好樂意去收㗎。」

正因人人故事皆獨特，僱主挑選人才準則應是「story-based」、「skill -based」，而不是「skin-based」。「又以我為例，如果僱主請咗我，我可幫公司設計網頁、睇英文文件改grammar，得閒又可講下笑話，令同事返工開心啲，團隊氣氛都好啲。如僱主請人只睇到文化差異，聚焦大家嘅『不同』，就會好易忽略人才潛力，實在可惜。」

阿V做全職棟篤笑多年，近來更衝出香港，到澳洲、紐西蘭、新加坡開騷。他相信，笑話既是歡樂來源，亦是跨越種族的「共通語言」，可化解成見並拉近彼此距離。

泰裔助理工程師Vorapitirangsri Chalisa：企業重多元文化　有利人才共融

這位女生黑長髮、大眼睛，單看外表難看出她來自少數族群，而她頭上安全帽貼著的名牌則透露了她「真正身分」。「我全名叫Vorapitirangsri Chalisa，姓氏加名字共有9個音，因為比較長又難讀，所以由細到大，除咗家人親戚，好少人能讀啱我個名。每位新朋友知道我個名後都問：『你係咩人？喺邊度嚟㗎？』，我多會答：『我係香港土生土長泰國人。』」

Chalisa的父親是泰國人，少時移居香港落地生根，而她於香港出生，在本地小學和中學讀書，後來到英國升學攻讀土木工程。「因父親曾做建築業，我自細耳濡目染，對工程產生興趣，加上數理科成績好，決定走工程呢條路。」

因為名字　求職不易

Chalisa和弟弟小時回泰國探親合照。他們長大後皆投身工程業。

「跨國」合作是常事

她面試順利過關，正式成為工程界一分子，入行由見習工程師起步，後來轉到另一家國際工程顧問公司工作，現職駐地盤助理工程師。她說，由於公司團隊國際化，員工種族多元化，「跨國」合作是常事。「工程師團隊融合不同國籍的人，如英國、土耳其、巴基斯坦、印度、印尼、馬來西亞等，大家開會可用英語溝通，合作不是問題。平日到地盤工作亦會遇見少數族裔工友，當中唔少喺香港生活多年，大家都係團隊一分子。」

共融無分「多與少」

Chalisa入行接受香港工程師學會的「Scheme A」訓練，現已受訓完畢，未來目標是成為學會會員。

Chalisa上班從不覺自己是少數族群，但在行內她屬人數較少的女工程師，而且工作屬一個較冷門「小眾」的類別——爆破工程。「我現時負責一個項目，要喺山裡炸出一個岩洞，再把污水處理廠搬入去。爆破前要喺岩石鑽窿放炸藥，我會協助檢視爆破項目嘅設計，核對炸藥數量同運送路線，確保符合規定。我認為，在工作中每個人都有自己嘅優點同特點，而且團隊每個成員都可發揮優勢，令溝通合作更順暢。」

她笑言，雖然自小已融入香港，但生活有樣東西仍「很泰國」。「同同事朋友食飯時就會睇到分別，我愛食偏甜食物，尤其鍾意椰汁做嘅餸菜。家人不時炮製泰國菜式，好似香菜炒肉碎、粉絲沙律，都係我最愛。」

巴裔航空界生力軍Malik Ruhab Ahmed：主動溝通與自信　打拼事業兩要點

「你好，我中文名叫馬力，個名係中學中文老師幫我改嘅，同我巴基斯坦姓氏Malik發音相似。我喺香港出世長大，住馬鞍山，中學讀沙田崇真，大學畢業後入機場返工……」訪問一開始，馬力主動介紹自己。

3個月升職1次的「dream job」

馬力說，公司提供VIP接待服務，他最難忘是接待韓國男團Super Junior。「現場有幾百位fans等候，我哋要同機場保安合作，確保過程順利安全。」

工作溝通與自信

馬力父母是巴基斯坦人，他與姊姊和兩位妹妹，全都在香港成長。「爸媽想我哋學廣東話，安排我哋讀本地學校。」學會廣東話和中文，除靠老師教導，也靠在工作自學。他16歲開始做兼職，曾當外賣員和送貨員。「以前喺沙田送外賣，老闆手寫外賣單地址，我攞住張單去到屋邨，望住大廈外牆名稱逐個字去對，我記性好，認字一次記得，今次學識『顯富樓』、下次學識『顯貴樓』，慢慢識得唔少中文字。」

他還會說英語和烏都語（Urdu），而自從在機場上班，更開始接觸第四語——普通話。「機場有好多內地旅客，我不時聽到佢哋講普通話，自己又慢慢試下講，例如『你好』、『打印』 （公司設打印服務）等，發音同廣東話相似，要學都唔太難。」

習慣香港工作生活，放假和家人回巴基斯坦探親反覺有點不適應，要融入當地文化。「一落機發覺那邊生活節奏比較慢，冇人會趕巴士返工，我亦要『入鄉隨俗』放慢腳步順便relax下，等到返香港再拼搏啦！」

「先鋒」計劃

文：甄榮康