
寫曾進傑(鷹鷹)時,心裡盤算寫他「有幾猛」定「有幾慘」——出世有兔唇裂顎被取笑、自細過度活躍症、讀書成績不理想,表面證供起碼7、8個慘,但在我前面如風般衝落山坡的鷹鷹,沒留下半點創傷疤痕。他知識豐富、分析力高、三鐵王、越野強、超正面、零個慘,另加在越野跑和三鐵界粉絲無數。
「偏食」的鷹鷹
你好抗拒返學?
「超唔鍾意,完全聽唔入腦,我坐唔定,上堂傾偈、瞓覺、交唔齊功課、走堂,經常被記過。」課室對鷹鷹是個牢籠,青蔥歲月愛在球場、田徑跑道和山頭磨蹭。
中學之後當上屋苑泳池救生員,又轉玩獨木舟、滑浪風帆、帆船、潛水。「我做半年救生員,搵夠錢,跟住外出旅行玩半年,又試過去澳洲working holiday一年,都因為我坐唔定。」
廿零歲男仔唔係要諗吓職業前景?
「真係冇乜點諗,好多人趁後生搵錢,等退休可以去玩。我就一路搵錢一路玩,而家都40歲,呢種生活模式冇大問題,好開心滿足。」鷹鷹走一條不一樣的路。
當年在學校被定義為讀唔成書嗰班,老師會唔會唔like你?
「咁又冇,老師都幾喜歡我,因為我唔搞事。老師成日話我有小聰明,家長會仲同我阿媽講鷹鷹唔係讀唔到書,係唔讀書啫。」
「成績我好睇得開,唔係唔勤力,我喺田徑隊好勤力,自動自覺一日操兩課。我見人哋跑得快,覺得自己都應該做到,就會好積極去做。但讀書我完全冇呢個心態,好早認定考試讀書唔係自己世界。」
你以前會唔會係有「ADHD」(即專注力不足及過度活躍症)?
「應該都係。我鍾意吸收知識,但讀書除外。出嚟做事嘅日子,我睇嘅書多讀書時成百倍。對於喜愛嘅嘢我好專注,例如可以由朝到晚對住架單車、遇到唔識嘅嘢會上網睇書搵答案、最鍾意拆開玩具同物件再裝嵌返,不過就係唔可以坐定定喺課室聽書。」
鷹鷹的「flow」
你第一個路步比賽係幾時?
「應該係2007年,第一次參加10K賽,跑40分。」第一場10K就40分,絕對骨骼精奇。
「跟住差不多場場10K賽事都去跑,跑到38、37、35,最快去到34分,開始見到家豪(陳家豪,曾是香港15公里和半馬紀錄保持者)個背脊。」
無論香港或國際大小賽事都玩過晒,而且獲獎無數,你對越野跑還有甚麼目標?
「成績唔再係我追求,就係要夠爽!」
可唔可以講多少少爽嘅感覺係點?
「我嘅意思係『心流』flow,當你好專注做一件事,會完全沉溺其中,對周遭事情沒有意識。我跑100K時會有、10K間中也有,玩team時最多。當在flow的狀態,會感到好high。」
筆者在山徑喪衝落斜時也試過有接近flow的境界。雖是「慢腳」,但慢有慢flow。
「係呀,越野跑落斜時好易有flow的感覺,我在大帽山連姐處跑上波頂都可以進入flow的境界。」筆者應該會進入彌留境界。
1年參加60場賽事
你試過1年最多參加過幾多場賽事?
「60場,包括14場海外。如果計連續3年,應該超過170場。」留意返,1年得52個星期。
你參加過咁多山賽,有邊場你覺得最有意義、最難忘?
「應該係2015年毅行,我哋4個人好有目標要打破12小時,然後逢星期三去荃灣衝斜路、走針草帽,星期六、日做長課。最後我哋以11小時58分衝線,仲係全場總冠軍,大家high爆,更打破當時華人最快時間,別具意義。」
你咁多年比賽生涯中,有冇遇過大挫折?
「記得有次跑學界1,500米,原本諗住可以贏,一路守住前3、4名位置,但中段時被後面跑手踩甩隻鞋,我就停低冇繼續比賽。事後阿sir問我點解唔繼續跑,我話冇咗隻鞋仲可以跑咩?只怪當時太年輕,其實就算遇到困難、贏唔到,總要跑下去。完成先可以無憾,想想我14歲嘅遺憾,帶到40歲。」
彩蛋
你而家40歲,覺得去到人生一個轉彎位未?你點睇前面嘅路?
「有日我坐喺救生台,諗未來10年、20年會係點?一片空白,心諗不如試下其他發展空間。最想喺外國開間士多,帶埋隻狗,對住個海或者山,賣下汽水、熱狗,得閒游下水、跑下山。」諗起都開心。
「跟住落寫字樓簽名resign。」好灑脫,一定係好型咁慢鏡行入寫字樓。
其實塵世間有好多選擇和方法,走不一樣的路都同樣去到「幸福邨」。
文:孫立民博士
華生職場顧問(Watson Consultancy)董事,有逾20年培訓經驗,擅以正面幽默角度為企業出謀獻策,解決管理難題。
FB專頁:www.facebook.com/suenlapmanConnect/
WhatsApp:91097058