
提起嬸嬸,我們會聯想到廣場、廚房和關愛座。的而且確,不少「50+」女士給自己畫地為牢,覺得到了四、五十歲要出身汗?「好曬喎!」、要跑上山?「咪玩啦!」,總有千萬個留在舒適圈的原因,抱有「努力不一定成功,但唔努力一定舒服」的信念。
但塵世間總有人活在bell-shaped curve的兩端,跑班兩位不一樣嬸嬸Eva和Corinna,去年12月5日前往泰國清邁參加Chiang Mai by UTMB @World Series(環勃朗峰超級越野耐力賽的major series,清邁賽事亦被跑友暱稱為「泰B」),並獲理想成績。剛成為奶奶的Corinna獲50K年齡組別第一,可直入UTMB的OCC;剛榮升做婆婆的Eva亦獲100K年齡組別第四,正摩拳擦掌代表港嬸進軍國際,發光發熱。

賽事終點拱門光柱輝煌閃爍,氣勢懾人。
「我哋誤交損友!」兩人異口同聲訴說。「有位龍姓跑友跑完清邁,回來極力向我哋推介,話好玩又唔難,攞手機相係咁sell我哋。」
享受比賽、學識唔望錶的Eva
Eva表示:「結果我報咗100K,每星期要加多幾課,聞說『泰B』的路又斜又原始,所以特別操練斜路。」
100K要打3個「大佬」,第一個與50K相同,頭4K跑平路,5至12K要上逾千米,然後持續落斜。「剛開始時漫長上斜都應付到,第二座山的CP(Check Point)遇到朋友,唔想耽誤佢,匆匆取幾塊餅乾便一起離開,沒有吃飽。」
嬸嬸為操練毅行,組隊參加雷利日征奪隊際冠軍。
「到最後一座山,覺得超冇力又肚餓,特別是下山時,從未遇過那麼陡峭的斜坡,又布滿浮沙碎石,好難平衡,『發軟蹄』跣低過好幾次,幸沒有受傷。幾經波折落到地面,雖然勁攰,但都迫自己慢跑,因下山花了不少時間要追返。」
「不過愈心急表現愈差,暗斜落山時險些拗柴,有一下腳好痛,即噴了撒隆巴斯再食止痛藥。」

約了兩位逆齡嬸嬸Corinna(左)和Eva(右)在餐廳做訪問,她們完成大賽有quota食甜品了。
「呢次我全程冇睇過錶,唔想俾壓力自己。毅行之後去睇物理治療師,佢叫我試下享受過程,唔好睇時間同諗名次。」「結果好好呀,過程雖然辛苦,但順住自己感覺,冇壓力、冇受傷、腸胃冇事,仲喺B7個CP坐低飲咗杯熱朱古力奶、食咗半個muffin,好享受。反而做到唔錯嘅時間,不用20小時完賽(19:32,組別第四),我之前好出力玩嘅HK100同Translantau都做唔到。」
「我第一次咁享受比賽,呢次會沿途欣賞下風景,遇到影相哥哥我會俾笑容,以前鏡頭都唔望。我係處女座,對自己好有要求,平時工作已經萬分緊張,經常失眠,俾自己好大壓力,亦令身邊嘅人好辛苦。」
以為獎杯無望仍鞭策自己的Corinna
「50K要清晨5點起步,戴住頭燈,在密林中摸黑上路,而且好耐都未天光。跑呀跑到一個轉彎位,晨光乍現,大家都有由黑暗進入光明的振奮。其實呢次『泰B』我冇特定時間目標,因為早前跌傷膝頭,又撼親額頭,所以今次目標只是不要再受傷。」

Eva學識唔望錶,但一定要望鏡頭。
筆者身為「support manager」,Corinna給了我一項任務——幫手監察大會的live track並且即時用手機匯報她的組別名次,估計衝線時間和在終點影相。
過第一個CP時,Corinna組別第一,我即時text她喜訊,但沒有read。沒多久live track顯示她是組別第二,半小時後已跌落第四,心想莫非嬸嬸開得太快現在耗盡?「我過了第二個CP才有機會睇手機,發現已由第一、第二,落到去第四,冇幾耐收到message去到第八,反而好開心,因為可以輕鬆跑,唔驚受傷。」其實Corinna最差時去到第十四位。

上得呢個台,就會朝著UTMB進發。
「去到尾段,雖知三甲不入,但望錶發覺有機會做到9小時內,雖然好攰,仍提起勁跑,見到好多後生仔女都變成『步兵』,自己堅持要繼續跑,就算只有跑的姿勢。」
我在場地遊蕩期間,突然接到Corinna電話,原來她已衝線。見嬸嬸好精神好fresh,隨即與她去check成績,見到竟然是組別冠軍,由第十四變回第一,這輛過山車實在太刺激。

呢個完賽樣,就係叫做「跑完好似未跑過」樣。
Corinna好激動,不敢相信是事實,直到一班美少女工作人員恭賀她並解釋:「所有組別冠軍與全場前五名都是明天在台上頒獎,組別第二、三名就現在即時頒獎座。」嬸嬸忍不住淚水奪眶而出,說好夢幻,但仍識得問:「我聽日著乜衫好呢?」
接著好多同學恭喜她,並告訴她在major series獲組別冠軍可直入UTMB相關賽事,這是Corinna嬸嬸不敢發的夢。「我冇追名次壓力,輕輕鬆鬆反而跑得幾好。」話雖如此,這些不一樣的嬸嬸總會訂些目標來追尋,不會給自己鬆懈,they make a difference in life。
文:孫立民博士
華生職場顧問(Watson Consultancy)董事,有逾20年培訓經驗,擅以正面幽默角度為企業出謀獻策,解決管理難題。
FB專頁:www.facebook.com/suenlapmanConnect/
WhatsApp:91097058