「如果要你嘗試做一樣嘢，靠自己諗策略完成，但好多人都覺得冇可能做到，而且確實好大機會會失敗，咁你仲會唔會做？」劉錦輝（Gordon）當初看見四徑報名表上，如此介紹這項「瘋狂」的比賽，結果他想也不想便決定做。自問是一名普通打工仔，在越野跑圈中寂寂無名，跑山從不追求獎牌，只想追尋「為了甚麼而活」，不願沉悶地老去，最終他一舉完成別人眼中「黐線」的壯舉。在72小時內狂跑300公里，途中經歷極端疲累、極度渴睡、腳腫腳痛，甚至在山上神志不清出現幻覺看見獅子老虎。在最後衝過終點成為四徑「生還者」一刻，他有這樣的感悟：「有啲嘢表面看似冇可能完成，但只要畀啲心機去做，結果可能係得嘅，而且唔係你想像中咁難。」在你的生活中，又有甚麼不能承受的難？
Gordon一身朱古力膚色、鋼條身形、大腿肌肉暴脹，一看便知是跑山健將。他卻笑著說：「其實我跑步唔叻、唔係由細訓練、玩比賽亦冇追求攞獎……簡單講，我只係nobody一名……」
「無名氏」挑戰越野跑巨人
這位跑山「無名氏」，卻偏偏挑戰越野跑界超級巨人─四徑，在72小時內，跑畢全港四大行山徑─麥理浩徑、衛奕信徑、港島徑、鳳凰徑，嘗試創造個人巔峰。「別人眼中冇可能嘅事，我想試下自己得唔得。」好些親友和同事，包括太太在內，知道他要報名參賽，異口同聲拋出兩個字─「黐線」。「佢哋話：『你又玩埋啲咁黐線嘅嘢？！仲要農曆大年初一至初四，唔去拜年去跑山，咁辛苦為咩？』」「巔峰」與「癲瘋」彷彿隔著平衡時空，Gordon說：「又係嘅，一次過跑山300公里，確係超出好多人嘅認知。」
Gordon參加撒哈拉超級馬拉松，遇上一位76歲阿伯跑手，為他帶來人生啟發。
對於眾人的質疑，他自有一個合情合理的答案，常人都能聽得懂。「人生匆匆幾十年，除咗日日朝9晚6返工放工，係咪應該搵啲特別嘢做下？尤其經歷疫情，睇到生離死別，就更令我覺得，人生苦短，唔好令自己沉悶地老去，於是重拾越野跑興趣。」從事管理工作的Gordon一向喜歡跑步，2018年開始跑山，疫情後決定認真訓練，參加越野跑團體「豐山跑」（Crazy Running Club），與跑友們一同練習。「開頭玩50k比賽，後來愈玩愈長，甚至出國參加超級馬拉松。」
跑撒哈拉沙漠遇「高人」
曾去日本跑富士山，也到過法國參加環勃朗峰超級越野耐力賽（UTMB），去年挑戰撒哈拉沙漠250公里超級馬拉松，遇到一位「逆齡」跑手，令他刷新「三觀」，下決心要征服四徑。「一連8日喺沙漠跑250公里，跑手當中有位76歲阿伯，係全場最老嘅參加者。我同佢喺比賽營地傾咗好耐計。佢話自從退休後，發覺身邊同齡嘅人，每日過一式一樣嘅生活，每朝晨運完就返屋企。佢覺得人生唔應該係咁，即使佢已76歲，仍可為人生創造驚喜，去世界各地參賽，用雙腳打破生活框框。我返到香港，不時諗起阿伯嘅身影，覺得活著就係要求突破、自己應該去盡啲，於是決定挑戰四徑。」
當跑山超越了興趣，變成「為甚麼而活」的追尋，每天辛苦操練便有源源不絕的動力，工作再忙也阻不了。「星期一至五，每朝5點起身，練跑斜路1小時，通常由荃灣跑上城門水塘，之後回家沖涼再返工。另外每周一晚定期參加跑班訓練，跑九龍東、畢架山一帶。至於星期六、日，視乎有冇家庭活動而安排短課或長課，短課跑一晝，長課跑一整日，試過逆走麥理浩徑，凌晨4點由屯門起步，跑到西貢北潭凹，全程100公里左右。」
300公里的暴走
不過，四徑的艱辛程度，還是遠超預期。四徑比賽由德國越野跑好手Andre Blumberg創辦，參加者要由屯門起步走畢麥理浩徑，到西貢北潭涌後乘車到沙頭角南涌，逆走衛奕信徑，走到衛徑終點赤柱後乘車到石澳，開跑港島徑，再從山頂跑到中環碼頭坐船入梅窩，逆走鳳凰徑返回梅窩碼頭終點衝線，全程298公里兼攀升14,500米。60小時內跑畢可獲「完成者」稱號，72小時內完成則有「生還者」銜頭。
Gordon(左二)與跑班跑友和教練參加毅行者。
Gordon說，四徑每年還會新增規則，為賽事「加辣」，例如禁用行山杖、禁聽歌、禁食止痛藥。「今年加咗兩項規例，包括唔准戴手錶、開賽6小時前才公布起步時間，跑手只知道大年初一開賽，但唔知幾點鐘，所以之前一晚瞓得比較差，我最終下午收到通知，確定晚上9點44分起步。」
全程跑近300公里，共攀升14,500米，他身心狀態就如賽道一樣，歷盡高山低谷，要一路挑戰自己能承受的極限。「從屯門起步逆跑麥理浩徑，去到西貢萬宜水庫東壩已眼瞓到極點，不停自言自語，叫睡魔唔好再搞我；之後跑衛奕信徑去到藍田，本想趕凌晨地鐵尾班車過海去鰂魚涌，結果趕唔到，要等第二朝搭早車，白白浪費5個鐘，心情好差好忟憎。接住過海跑港島徑又出現咖啡因副作用心悸情況，雙腳腫痛，愈跑愈沮喪，後來更打定輸數，諗住跑完港島徑去到中環碼頭就放棄，唔搭船去梅窩跑鳳凰徑。」
神志不清「見到獅子老虎」
那時夜已深，本想放棄的他跑到山頂盧吉道，突然收到一通打氣電話，令他打消棄賽念頭。「跑班支援者Tania 和教練KFC（張祺豐）打畀我，叫我唔好放棄，提醒我20分鐘後，中環碼頭會開出梅窩尾班船，我即刻跑落山或者趕得到。雖然20分鐘內由山頂跑到中環碼頭，好似冇咩可能，但經佢哋不斷鼓勵，我就試下盡全力奔落山，結果真係得咗，成功去到碼頭趕上尾班船。」
Gordon稱，對四徑跑手來說，綠色郵筒有著特殊意義，因比賽就是以梅窩碼頭的綠色郵筒為終點，見證人生跑過一段「癲癲地」的旅程。
到了梅窩碼頭，就地躺下睡半小時，然後跑上鳳凰徑，隨即陷入神志不清狀態。「去到貝澳引水道開始出現幻覺，一時見到野豬、獅子、老虎，一時見到好多人歡呼打氣，腦海又有好多奇怪故事湧出嚟。我一直迷迷糊糊，行唔到直線，有時感覺自己呢一秒坐低，下一秒又走動；試過搣自己、打自己，令自己保持清醒，但都冇用。條引水道只有幾公里長，但我足足行咗幾個鐘。」後來天亮，他看見日出，漸漸醒過來，走出引水道「結界」，並咬緊牙關完成餘下數十公里賽程，好不容易到達梅窩碼頭郵筒終點，以70小時57分37秒完成挑戰，並成為第7名衝線的「生還者」。
「極端攰」與「生還」啟發
Gordon說，能完成比賽不是靠個人力量，而是有賴團隊支援，一連數日在山上的飲食、睡覺，以至換衫、刷牙，全靠跑班好友和教練KFC支援供應。他還特別感激太太當他的後勤戰友。「報名參賽時，我特意邀請太太擔任我嘅支援者，因我想佢知道，我點解要玩埋啲咁『黐線』嘅嘢。佢沿途一直用行動支持我，為我炮製愛心飯盒。現在佢就更明白我點解成日去跑山喇。」
在四徑中「生還」，Gordon要感謝他最親密的戰友兼支援者，亦即他的太太。
Gordon說，能夠在四徑比賽中「生還」，對他也有很多啟發和得著，包括在「極端攰」之下的自我認識和修煉。「好多人經歷過攰，但我相信冇咩人體驗過極端攰，當你身處極端攰嘅狀態，你會顯露自己最真實一面，例如有啲人會變得好自私、推卸責任，至於我，喺比賽中體驗種種困難，包括極度渴睡、腳痛、趕唔到尾班地鐵……我發覺自己雖然都會發脾氣，但能夠好快適應同面對現實，思考點樣變陣繼續走落去。當我真正了解自己，返到日常生活中遇到困難，例如返工趕project有阻滯，我就能夠更快地調整心態、更有信心做應變決定。」
Gordon在終點與四徑創辦人合照。
作為一個半途出家、不爭名次的跑山nobody，他還有一個重要的感悟：「有啲嘢表面看似好難、冇咩可能完成，但只要你畀心機去計劃、練習，鍥而不捨去攻頂，結果可能係得嘅。就如我一開頭講，我係nobody一名，但都可成為四徑生還者。呢種心態，除可用於比賽，仲可應用於工作、家庭，以至個人生涯。呢樣係我最大領悟。」
文：甄榮康