「唔係啩，呢個係坤哥？估唔到佢做咗空手道運動員！」提起坤哥（吳業坤），大家都難忘他那一副「唱到起霧」的眼鏡，沒想到他悄悄換上空手道袍，當他除掉眼鏡、踏上擂台，兩眼竟透出戰鬥的目光。「我都估唔到自己會有呢種眼神，但出場比賽總唔可以好似唱情歌咁望住對手。」出身平凡的坤哥，有著不平凡際遇，入行高高低低都經歷了許多。他笑言人生從無計算太多，機會來到便把握，不管受到讚許或批評，他都心存感激去「盡做」。如今腰間繫上空手道黑帶，他更要感激那練過1萬次的直拳，為「30+」人生打過實實在在的一仗。

坤哥加入娛樂圈15年，當年由大專生變身藝員和歌手，其後橫掃四台新人獎、在紅館開個唱，3年前突然在IG宣布與日籍女友結婚成為人夫，到今天當上空手道運動員，他彷彿每步都藏著「彩蛋」，令人意想不到。到底是他刻意叫人難以捉摸，還是大家還未認識真正的坤哥？他沉思了一下，淺笑道：「其實諗返轉頭，人生好多嘢，我都冇刻意鋪排過，亦冇計算太多，我覺得，好多事情，嗰刻你有機會、有能力又想做，就要馬上去做，否則你諗太多、遲兩秒，機會就可能冇咗。」

空手道的實在與平衡

從舞台跨進空手道道場，不是為搶光環、博掌聲、「cosplay」運動員，而是純粹想給「30+」人生，一次認真的試煉。5年來付出許多汗水，贏過多場選拔賽，而他腰間的黑帶，確實一拳一腳打回來。「大家見到我係認真嘅，唔係想博啲咩，所以都支持我，冇咩harsh嘅comment。」

到烏兹別克作賽，坤哥力拼強勁對手，毫無怯場。

這邊拿咪唱歌，那邊擊出直拳，令坤哥意想不到是，在拳來腳往賽場上，他反而得到一份平靜感覺，給他找到生活平衡點。「做歌手條路，唔係一級級咁上，亦未必有step，你有時位置高啲、有時低啲，而唱歌好唔好聽亦較主觀。但空手道唔同，你一拳打中對手攞到分，就有一種好實在嘅感覺。你努力練十年、廿年，就可去到某個級數。生活需要balance，我喺空手道世界入面搵到呢份平衡。」

（IG：@kwangorrrrrr）

眼神有「殺氣」

除了拳腳的實在，空手道還賦予他另一種眼神。穿上道袍，除下眼鏡，坤哥兩眼透出帶「殺氣」目光，與他唱《原來只因深愛着》的情深款款判若兩人。「我覺得係一種堅定嘅眼神，未至於有殺氣。打比賽確實需要呢種眼神，用對眼話畀對手聽，我一定要贏你。」

因為出場比賽，不單比招式，還要拼意志。「就算你好辛苦，都唔可以示弱。記得第一次比賽，打到冇哂氣，露出好攰嘅表情，即刻畀對手睇穿咗，佢唔單止冇留手，仲起勢咁攻我，我最後畀佢KO咗。之後我就學精喇，無論遇到咩情況都保持堅定眼神，提醒自己唔可以洩氣。」

坤哥空手道黑帶得來不易。（IG：@kwangorrrrrr）

有心不怕遲

一向喜歡日本文化的坤哥，之所以迷上空手道，皆因2020年疫情時工作叫停，想專心學一門技藝，其後在社交媒體認識前香港空手道精英運動員李偉志，遂拜師學藝。坤哥坦言，一開始也有想過年紀會否成問題。「30幾歲先嚟學空手道，會唔會有困難呢，至少從生物學角度睇，年紀同體力係會爭啲，但我都冇諗太多，有機會做就去做，而過程確係辛苦。記得第一次跟教練上堂練體能，做掌上壓、sit up、深蹲……做完一組動作已攰到冇命，但教練話至少要做5組。我估唔到自己體能差咁遠，唯有不斷嘗試突破自己嘅極限。」

坤哥年初參加 「第十五屆全國運動會」香港運動員代表選拔賽，最終獲得第四名。（IG：@kwangorrrrrr）

白帶入門，從基本功起步，練習直拳、擋格、轉腰、踢腿……雖是「超齡」學生，但有心不怕遲。「白帶首次考試，正值疫情時期，身邊有兩個小妹妹一同嚟考試。我同自己講，如果我考唔到，就真係失禮喇。」

每次比賽獲獎，背後要付出無盡汗水。（IG：@kwangorrrrrr）

「三字頭」當運動員

苦練5年，由白帶考到黑帶，一邊參加公開賽，一邊兼顧唱歌拍戲，坤哥坦言不容易。「有次喺內地拍戲，要為比賽做準備，每日抽時間練習，但當地冇空手道場，只有一間泰國拳館，我只好硬住頭皮入去，請拳師同我練一練，做簡單出拳同擋格動作都好。」

坤哥與師傅李偉志。（IG：@kwangorrrrrr）

他曾問過師傅：「你估我三字頭仲有冇機會可以入到港隊呢？」儘管心裡沒有肯定的答案，他決定邊打邊試，其後參加多項公開賽並贏得獎牌，包括全港空手道大賽男子成人組手新秀組亞軍、全港空手道成人色帶組別大賽男子成人組手啡帶組亞軍等，後來入選香港初級代表隊，今年5月到烏茲別克出戰亞洲空手道錦標賽（AKF）選拔賽。「估唔到我都可以講一聲：『我係香港運動員（兼職）。』」

做綠建大使

坤哥早前以空手道運動員身分，為建造業議會及香港綠色建築議會合辦的「香港綠色建築週2025」擔任綠建大使，推廣綠色建築和碳中和。原來一向熱愛大自然的坤哥，與綠色環保頗有淵源，讀大專時主修科目正是環境科學，雖然未畢業已加入娛樂圈，但仍保持環保生活習慣，現在與太太都會做好家居垃圾回收分類，注重減排節能。

越級挑戰　雖敗猶榮

他原本正忙於拍攝電視劇，但為到烏茲別克參賽，特地向劇組請假9天。坤哥說，那次越級挑戰84公斤以上級別賽事， 選手磅數無上限，且有不少摔撻動作。「加上我係新手，冇大賽經驗，大家都擔心我受傷。」首次參加大賽，心情亦難免緊張。「好似第一次上紅館唱歌，係一定會驚，但我同自己講，自己係得嘅。參賽唔係為攞第一，要吸取大賽經驗，盡量避免受傷。」

首場賽事碰上越南選手，對方比他高出一個頭，「比賽前，選手各自喺場區熱身，教練叫我唔好望向對手嗰邊。當時我唔知點解，事後我問返教練，佢話對手好勁，拳腳可打到兩塊蓆嘅距離，好似識飛咁。」雖然強手當前，坤哥毫不怯場，放膽去打，與對手互有攻守，打完3個回合，卻因大會計分儀器出現技術問題，需要重賽。「打完第一場已用盡全力，所以最終都係輸咗。今次參賽見識到世界級嘅選手，知道自己有幾渺小，雖然輸咗但嗰種痛快係無可取代，一日仲郁得我都會練得再好啲，下次再打得好啲。」

坤哥3年前與日籍女友濱口愛子結婚成為人夫。（IG：@kwangorrrrrr）

由「毒男」到人夫

那次比賽完畢上機返港，他在社交媒體發放照片，並在帖文下給太太濱口愛子留言：「死んでない！」（還沒死），之後太太秒回他：「見守ってたよ」 （一直在默默守候著你）。坤哥說，每次比賽，太太都不會在觀眾席出現。「因怕太太擔心我受傷，會愈睇愈驚，所以叫佢唔好去。」太太一直默默在背後支持他，還為他親手縫上出賽道袍的港隊徽章。

坤哥早前為太太慶祝生日。（IG：@kwangorrrrrr）

初出道被冠以「毒男」稱號，又有網民指他是「偽毒」。無論外間怎樣說，坤哥現在確實變成了成熟的人夫。「以前同媽咪住，有媽咪照顧，而結婚後變成一家之主，要諗下點樣維繫家庭，令家庭變好啲。以前亂講嘢、亂留言，最多自己畀人笑，但現在唔同，隨時會影響埋太太，所以凡事要諗真啲、穩陣啲。」

唱到「眼鏡起霧」經典一幕。（IG：@kwangorrrrrr）

我要感激直拳

今天已變身「黑帶坤」的他，還要特別感激直拳給他的領悟，就如新歌《感激的直拳》的歌詞：「拳法不過時，永不會遲，要專注於感激的本義，取勝時，跌倒那時，每式每招亦忠於我的本意。」

文：甄榮康