
「公司班後生仔真係好難搞!講極都唔聽,鬧又唔得,加人工都留唔住!」筆者上星期與一位中型企業主管飲茶,對方大吐苦水。因他部門的3個「90後」骨幹同期遞信,令公司項目近乎停擺。這個場景,是否好「熟口熟面」?
傳統管理者迷信「動之以利,懲之以理」,以為下屬跟騾仔沒有分別—前面「掛條紅蘿蔔」,後面「揸住藤條」就識行。但今時今日,你仍沿用這套「出土文物級」的管理手法,那班「90後」、「00後」真的會跟你「講拜拜」!
試想想以下場面:IT部阿明花了三分一時間,寫了一個自動化程式,將部門匯報流程提速5倍。怎料上司不單沒有讚賞,還說:「唔跟足公司SOP做事,聽日全部改返人手操作!」結果3個月後,阿明帶著這個程式「跳槽」去競爭對手公司,還升任項目主管,這就是「管理近視眼」的代價!
啟導式領導=人才磁石
為何世界級企業如Google、Netflix特別重視「coach」文化?因為真正人才,要的不只是「份糧」,而是「成長感」和「可能性」。
某大銀行的部門主管陳太,她帶團隊有套秘訣:「每逢新人報到,我第一句就問:『你3年後想成為點樣嘅人?』」有年輕人說想學區塊鏈技術,陳太便安排他參與跨境支付項目;有同事想轉戰市場策劃,她就爭取跨部門合作機會。結果呢?她部門流失率全行最低,更成為公司「人才搖籃」。
從「管住對腳」到「點亮個腦」
舊式領導似「放羊」—看守羊群不要四圍走;新型啟導似「園藝」—幫每棵植物找最合適生長環境。
某連鎖店區域經理昌少,面對個性張揚的「Z世代」員工,發明了一套「3分鐘教練法」:「每次巡舖唔會即時『指點江山』,反而會問:『如果呢個係你嘅店,你會點樣擺設?』、『頭先處理投訴嘅手法好特別,背後有咩諗法?』」正是這種尊重,激發出不少創新點子,更有「00後」店員提出「直播清貨」方案,試行1個月、業績升三成。
征服靠權力 信服靠魅力
最犀利的領袖,並不是將下屬變成「應聲蟲」,而是令他們願意盡展所長。就如足球教練,不會落場幫球員射波,但是懂得排陣布局、激發潛能。
某初創公司CEO阿Ray分享:「有次產品設計deadline前,『90後』主設計師突然話要推倒重來,傳統管理者實『爆血管』啦!但我坐低同佢講:『睇得出你好有passion,講個新方向嚟聽下?』」結果新設計上市後,成為公司最暢銷產品。阿Ray笑言:「管理者最大成就,就係見到團隊諗到你都諗唔到嘅正嘢!」
啟導實戰三式
想由「管理者」升級成「啟導師」?記住以下3個心法:
1. 將「指令」變作「提問」
不要說:「你應該咁樣做!」,改為問:「你覺得點樣可以做得更好?」就等於教人游水,與其在岸上指手劃腳,不如落水一齊試。
2. 將「批評」轉為「發現」
見到下屬「撞板」,與其說:「你錯喇!」,不如問:「從今次經驗發現啲咩?」讓失敗經驗,立即變身學習機會。
3. 將「監管」化成「啟發」
設立「每周瘋狂點子時段」,好似某廣告公司設立「15%自由創作時間」,結果公司「最爆」的幾個campaign,都是源自這段「玩嘢時間」。
管理者的「新駕照」
以前帶團隊「似揸棍波車」,轉數、力度全部要你跟;現在「似揸自動波」,你要做的是幫他們「睇路」、培養「車感」。若有下屬而不懂專業啟導,好比「無牌駕駛」—害己害人,而拙劣管理更可摧毀整個團隊的潛能!
時代變,領軍之道都要變。與其抱怨新一代難管,不如升級自己那套「領導作業系統」。當你由「管理者」進化成「啟導者」,就會發現:不是新一代「難搞」,而是舊方法「已經配唔上新腦袋」!
文:劉丹心
NLP大師級導師、心智教練,人稱Samuel Sir,25年企業培訓實戰經驗。