一世人流流長，總會遇到幾個「wake up call」—提你要發憤做人不再浪擲青春、勸你止蝕放下一段失血的感情關係、叫你離開前景暗淡的崗位去轉工或創業。年輕人聽到這些call可以來個華麗轉身，但人到中年，wake up call總餘音裊裊、纏繞無盡的猶豫和疑慮，to be or not to be，千迴百轉，又是數個無眠的晚上。
阿歹（謝覺偉）在35歲時接到wake up call，叫他離開失意的甲組足球場、也不要再幹勞碌奔波的運輸裝修行業，深吸一口氣便轉做全職運動員，在山界創建自己的舞台。做全職運動員？會不會是騙案？連AI也答不出，阿歹卻沒想太多就「應call」。
Wake up call可以是叫人追夢，也可以是搖醒人不要再發夢。剛從世錦賽回來的阿歹，他的wake up call是叫他繼續追夢還是夢醒？
中年大轉身
「我在2023年奧地利世界山徑越野錦標賽取得不錯成績（第31名），於是決定辭去所有工作，自封為全職運動員。」那時阿歹35歲，這是個遲來的wake up call，他果斷地應call，外人覺得他「好英」。
為興趣而跑可以離場，選擇職業運動員條路就要撐下去。
「謝太點睇？」我問。
「最近我同佢講未來兩年嘅跑步計劃，佢聽完之後望住我冇乜出聲，好似話你要攞成績返嚟證明你係身體力行，唔係去玩。」
「呢個決定難唔難做？」我追問。
「唔難，我唔係唔鍾意嗰時嘅工作，只係我更鍾意跑。由於我喺世錦賽攞到前三分一位置，夠資格申請入體院，但因為唔係奧運同亞運嗰類大賽，我當然係最低級別嘅體院運動員。」也就是，仍要為生活拼搏。
「後嚟經田總介紹我現時嘅教練村尾慎悅畀我，佢好有來頭，曾經教過世錦賽馬拉松冠軍同奧運銀牌選手。費用由田總負責，佢會日本、香港兩邊走。」
「教練有冇定目標畀你？」我問。
冧到謝太到運動場跑返轉，證明「批文」已到手。
「有，佢希望我用4個月時間隻馬做到2:20，之前我渣馬跑2:32，12月開始跟教練，2月渣馬我跑2:29，即刻見到進步。4月跑倫馬，做出2:24 PB，快咗5分鐘。」去到這個水平，跑快一、兩分鐘已經要開香檳還神。
阿歹說這場倫馬是「用生命硬接」，已經去到極限，不可能再快過2:24，而且傷患纏身，教練看在眼裡，也不迫他「還2:20條數」。
「跑到2:20又點，我冇可能去到2:1x，甚或2:0x，而家我只會keep住每年跑一隻渣馬。」認同作為職業運動員，目標不是追PB自high，應是追頭三名選手，如果連「尾燈」都不見，就不要再浪費時間。
俾教練鬧「慢過女人」
「山賽方面，教練都有畀目標，我差不多每次都啱啱達到，反映佢眼光極之準確，呢吓勁。」
倫馬，笑住跑。阿夕話因為見到屋企人，呢個紋身佬百分百family man。
「聽講村尾教練都幾『魔鬼』，實情有幾魔鬼？」我好奇問。
「佢唔係好講嘢，冇乜表情。但佢成日笑我渣，話我跑得『慢過女人』。」
「因為2024年我第一次參加日本呂間湖100K超馬，跑6:40（第5名），但女子世界紀錄係6:30，所以佢笑我『慢過女人』。我終於喺舊年6月日本超馬跑到6:28:39（獲全場總冠軍），等佢以後冇得再笑我。」
「相處咁耐，教練有冇讚過你？」我問。
「有呀！」阿歹即刻有反應，可能因為罕有。「12月嘅印度超馬，教練親自到場督師，好大壓力。我跑第8名，教練走埋嚟拍一拍我膊頭，跟住講咗句well done！」
全職運動員的日子
「我真係冇乜娛樂，晨早起身跑一課，休息下；下午做體能，再跑多課。中間嘅時間會撳吓手機，但有時會諗不如撳少啲手機再練多課，否則我哋追唔返外國選手。」全職運動員這份工「冇hea位」，每天每一分鐘都在難為自己、迫害自己，「hea少少」都不能原諒自己，又內疚又盛。這樣的生活，簡直來回地獄又折返人間。
印度邦加羅爾的超馬世錦賽全場第八，寫下港隊光輝一頁。帶住母親衝線和想著背後辛酸，愛哭的阿歹一時感觸。
「有跑友問我，點解你跑山唔使食gel、唔飲水？有鬼錢買咩！我唔講出嚟之嘛、咁肉酸點講呀！30幾蚊一包gel，去郊外士多買水要廿蚊，操一課成本好貴，特別疫情時，我冇工作冇收入。」苦日子通常造就偉大運動員。
「10年工作經驗令我更了解自己，最重要知道自己要啲乜嘢。面子，其實冇乜所謂，我睇得好淡，衰咗就接受、唔好搵藉口。我有時傷咗都係忍住，冇同教練講。」阿歹不愛訴苦。
2024年阿歹的成績不太理想，曾質疑自己短短的全職運動員生涯是否已走到盡頭，他最後選擇站起來繼續跑，決定跟命運對賭，因已押下了青春的注碼，不可以就這樣「清袋」離場，對自己、對信任的人如何交代？
20,000円事少，香港仔可以喺日本企「C位」最威。
「你點說服自己繼續走呢條咁technical嘅路？」我問。
「兩個理由：第一，我應承過要帶住已在天上嘅阿媽四處去；第二，要跑到冇晒錢至唔跑。」型！
彩蛋：你有冇社交焦慮症？
阿歹給人印象是個低調宅男，少出聲，不愛應酬。但作為全職運動員和山界明星，點都要拋頭露面、成為焦點、被人圍攏。
「好似同你性格唔係好夾，慣唔慣？」我問。
「起初唔太鍾意，覺得有啲難為自己，後來都慢慢接受。其實我仍然做返我自己，唔會點修飾，會照爆粗。」
「你有冇社交焦慮症？」我再問。
「有呀，呢兩年去完日本集訓返嚟，好怕見到咁多人。喺街行會塞住耳仔，但我喜歡行街。」
就像《國產凌凌漆》表面是風筒、實際是鬚刨的戲軌，阿歹表面是金毛紋身、做運輸嘅佬，但其實是堅毅刻苦、有目標有理想的感性I男（處女座）。他真摰的笑容令滿臉雀斑起動，童真滿溢，在藍天白雲下的山徑奔馳，追趕一個遲來的夢，祝願成功！
文：孫立民博士
華生職場顧問（Watson Consultancy）董事，有逾20年培訓經驗，擅以正面幽默角度為企業出謀獻策，解決管理難題。
FB專頁：www.facebook.com/suenlapmanConnect/
WhatsApp：91097058