蘇潔瑩（Debbie）是九龍某醫院的急症科醫生，今年在「環富士山極限越野賽」100英里組（Mt Fuji 100mi）獲得女子全場第八名（港一！），也是雷利計劃（香港）（Raleigh Challenge）的主席，3個身分，3種體會，3份情懷，交織成一個有汗水和淚水的故事。

默默走上Mt Fuji 100mi頒獎台

Debbie謙遜溫文，笑容燦爛，是個陽光女孩，很難聯想她是時刻與時間和生死搏鬥的急症科醫生，更是罕有的本土百英里女子跑手，相信一定有個「前傳」。

默默上路，沒有開電話，不知名次，Debbie只希望30小時內完成。

「比賽期間我冇睇手機，去到最後一個CP（還有18K），食住好難啃嘅烏冬時，與男友溝通『接放學』，打開手機才知守住女子第八位。佢話我同第七名相差約15分鐘，雖然好攰又咳，不過有motivation守住。」

「我有腳底筋膜炎，長跑腳板會痛。如果冇咗要追前面嘅動力，呢5K我一定會慢慢行返去。」她最後跑出耀眼成績。

從低谷中走出來

Debbie於2016年畢業實習後在急症室任職，該部門與毅行者合作，派護士與醫療輔助隊合作在CP做醫療支援。「我2020年加入跑會，可惜沒多久就要專心應付急症專科考試，只好暫時放低跑山。」

Mt Fuji 100mi，難得連續兩年都有香港女醫生上台，是女生太強，還是醫療界勁？

「2022年完成專科試，重新操返，但發現力不從心，一段長時間不在狀態，想過係唔係要放棄？」應該「止蝕離場」還是「死守博反彈」？要麼問AI，要麼交給命運決定。

「去年教練邀請我組隊玩毅行，目標大約14個半鐘，係好大嘅動力去推動自己。咁啱2025上半年被借調往衞生署衞生防護中心工作，返九五工，可以定期返跑班。」後來因大埔宏福苑火災毅行者取消，毅行最終沒有成行。

但Debbie開始好勤力上跑班，參加長、中、短途比賽，成績亮麗，今年她將往法國朝聖，參加越野跑界的光明頂「環勃朗峰超越野耐力賽」，是值得留意的黑馬。

雷利的守護天使

雷利衛徑長征（Raleigh Challenge）始創於2000年，是衛徑的「signature race」，但也是一個被塵封了的老牌山賽。Debbie是現任雷利幹事會主席，在大學時參與雷利的青年歷險計劃。她深懷這份啟蒙之情，大學四年級時沒住hall也沒上莊，一心參與雷利搞活動和參加越野賽，一起走過漫長的高山低谷。

Debbie集雷利主席、義工、掛標、物流、司儀、公關、阿四於一身。

「我2012年第一次搞雷利衛徑長征，有1,300人參加，舊年只有300多。」當年讓一眾越野跑手引頸以待，現時起步的拱門冷清寥寂。

每年的雷利，Debbie都包攬很多工作上身，做物流、搵贊助、掛絲帶等。大清晨5時多她已到起點set up，黃昏時又在城門水塘主壩的終點打點，等候零落的跑手衝線。入黑後，她仍在寧靜的水塘旁忙於安排頒獎：「請男子50+組別第三名XXX上台……」她沙啞的聲音劃破夜空，卻聽不到迴響。

「作為賽事搞手，我有啲心痛同可惜。我諗可能係愈來愈多本地同國內外嘅賽事競爭，而且我哋亦唔擅長做marketing，有好多嘢真係可以做得好啲。」努力不懈的Debbie正向其他賽事搞手取經。

「因為長途賽，CP開放時間長，物流上CP比較難提供冰。前年有人反映冇冰凍可樂，我哋明白香港10月天氣都係超熱，雖然會花不少人力物力，上年CP我哋都堅持增加冰鎮可樂，因受跑手歡迎。我哋團隊有努力籌備，但turn out參加人數未如理想。搞雷利確實令我感到burnout，有種讀書定工作都未遇過嘅無力感。」Debbie有些哽咽。

「呢個係香港其中一個最歷史悠久嘅山賽，係好多年資較長跑手嘅集體回憶。今時今日香港好似咩都好容易消失，要保留有歷史價值嘅東西唔容易，我哋更加要堅持，好好留住佢。」

Debbie說雷利今年會有重大改革，希望以一個新面貌同大家見面。且看這位雷利守護者和急症科醫生如何「施救」，祝願廿年的老牌賽事能重獲生命氣息。

急症室看生命的脆弱與無奈

「讀大學時，我諗緊做骨科或急症科，好多喜歡運動嘅同學都會考慮呢兩科。後來發覺自己對上螺絲、鑲鐵釘等唔係好大興趣，所以決定讀急症。急症室工作令我可以接觸更多不同年齡、背景同病況嘅人，冇咁悶，又可以豐富自己嘅閱歷。」

Debbie曾代表香港急症科醫學院跑步隊出戰渣馬。

「有個廿零歲嘅女仔嚟睇急症，話好唔開心，情緒有困擾，瞓唔到覺。第二次嚟急症時媽咪同佢一齊，媽咪其實好錫佢，俾錢佢搬出去住，以免被家庭糾紛影響。女仔也願意同媽咪去睇精神科醫生，件事好似暫時安頓下來。」

「隔咗一個星期，聽到急救房有個女仔遇上交通意外，情況危殆，不幸後來救唔返。當時我唔係負責醫生，但有走過去望下。一望病人個名，就認得係之前那位女孩。後來網上新聞片段睇到，懷疑佢突然故意走出馬路，而佢當日朝早先同媽咪覆診完精神科。箇中原因可能只有佢同屋企人先清楚，而佢媽咪喺醫院已經崩潰……」Debbie第二次說不出話來。一瞬間，一個念頭，沒了一條生命，之前一切的努力都變得徒然、無奈。

「你做咗近10年急症科醫生，看盡生死一線間，麻木未？」我問。

「未㗎，我記得事發當晚放咗工，心中仍然纏繞住『我係唔係可以做好啲、做多啲』嘅思維。我要出去跑步，先可以平復心情。」

歲月洗刷不去的……係愛呀。

「我哋急症室都做緊end of life care服務，一些臨終重病患者，時間無多，我哋會提供一間獨立房，可以畀家人陪病人最後一程；同時會處方特別藥物，減少病人痛苦同癥狀，令佢哋有尊嚴渡過人生最後一段時間。急症科醫生一路嘅training都係點去救返一個人，反而冇太多教點樣令佢哋更加舒服同安祥離開。呢樣關顧親情需要嘅工作，令我覺得好rewarding。」

於清風吹拂的山徑，在Debbie身上不單感到蓄勢待發的一股勁，也看見黑夜裡螢火蟲的一點光！

文：孫立民博士

華生職場顧問（Watson Consultancy）董事，有逾20年培訓經驗，擅以正面幽默角度為企業出謀獻策，解決管理難題。

FB專頁：www.facebook.com/suenlapmanConnect/

WhatsApp：9109 7058