在火炭工廈一萬四千呎倉庫的一角，Kit和Gucci正對著鏡頭做直播：「呢一件係我哋TML三寶其中一寶—痴線褲！今晚買兩條以上每條減10蚊、買4條每條減廿蚊。顏色方面，仿牛仔黑有3個款，第一款係我著緊嘅穿窿破爛版， 仲有拉鏈版同假鈕版……」直播螢幕背面貼著「日日爆數」的牌子，這盤生意雖不是「分分鐘幾百萬上落」，但確實開播時間就是金錢。

這對創業夫妻檔本身是百分百「潮人」，對追逐潮流產品有著由心而發的狂熱，少時曾一同在潮店Catalog工作，後來把興趣、經驗，以及搜羅潮物的慾望，化作創業本錢。先在大埔開時裝店，再將生意發大，創立直播平台TML Global LIVE，靠著天時地利人和加上「一個掣」的威力，在網購界成功發圍。

有時夫妻拍檔直播會互相整蠱、互窒，希望帶給觀眾歡樂。

零售打工仔變老闆

Kit和Gucci識於微時，15、16歲一齊在麥當勞兼職，畢業輾轉入行做零售，同在潮店工作，結婚生女後萌生創業念頭。Kit說：「大女出世，當抱住阿女一刻，突然有種好大責任感，我問自己：『如果我一輩子打工，人工加得唔多，點樣畀到最好生活佢？』所以我同老婆講：『不如我哋出嚟博一博？唔試就一世啦！』」Gucci則笑言：「起初創業開舖只想有多啲時間陪阿女，睇舖可以順便睇韓劇。 」

他們後來在大埔廣場開時裝店，再慢慢發展代購平台。Kit稱：「我哋兩公婆好鍾意搜羅日本、韓國、台灣、泰國新奇好物。起初只係自己買，又順便幫朋友同舖頭熟客一齊買、share下運費，點知反應出奇地好！於是決定將『好物分享』做大佢，變成幫大家把關嘅代購平台。」

「痴線褲」成為自家熱賣產品。

「一個掣」改變前路

生意能成功做大的關鍵在於「一個掣」。「呢個掣，完全改變咗我哋之後行嘅路。」Kit回憶，2017年某天，他發現Facebook新增直播功能，好奇按鈕一試。「當時我喺泰國旅行，一邊行街一邊開live，同幾十個香港朋友分享見聞，大家反應好熱烈。之後我諗：呢樣嘢，係咪可以用喺生意？於是返到香港即刻試一試。」

回港後決定與太太在店中做直播，但剛開始時反應奇差。Kit說：「試過得幾個人睇，嗰種對住空氣講嘢嘅尷尬感好大，好彩我面皮夠厚，不過都唔算好挫敗，因為覺得冇嘢輸！」

Kit和Gucci說，公司能一路擴展，有賴員工努力打拼。

雖然反應淡薄，但他們不斷嘗試，後來直播推介一條「痴線褲」爆紅。Gucci說：「當時去韓國看見彈性、skinny嘅『痴線褲』，但只有一個尺碼，唔係人人啱著，於是我哋搵廠商自行研發改良。直播時可以直接喺鏡頭前向觀眾介紹產品，試上身展示、教配搭，反應遠超預期。條褲賣到依家仲賣緊，好好賣。」

生意模式賺錢兩招

之後密密加推產品，生意隨著直播而放大。Kit回憶道：「貨物堆滿舖頭，要問附近超市借裝貨大鐵籠，每日將3、4籠貨推去順豐寄件。順豐職員話，我哋係全大埔寄件最多嘅店舖，之後我哋更請咗順豐個同事過嚟幫手。」公司規模一路擴大，由最初數百呎商場舖位，擴展到一萬四千呎工廈單位，團隊亦由兩人增至50人。

夫妻去外國亦照常做直播。

不過，香港做網購不易，早有大平台分食市場，中小企憑甚麼殺出血路？ Kit指出，公司生意模式非常簡單直接，就是 「薄利多銷」加上「直播電商」。「我哋直接同外國品牌方或大型批發商傾，用極大採購量壓低成本，盡可能跳過多層中間代理。而後台系統會自動將留言轉化為訂單。客人可選擇去門市自取或送貨。一件貨可能只賺十零廿蚊，但當一次直播賣出幾百至千幾件，累積嘅利潤就足以支撐公司繼續營運！」

直播土炮入屋＋貼地

另外，直播能吸納忠實粉絲，風格要貼地和有人情味。Gucci指出：「我哋唔會刻意修飾，冇彩排、冇講稿，希望呈現真實一面。試過喺廚房做直播推介一款麵，點知煎完隻蛋唔記得熄火，燒燶咗個鑊鏟冒煙，觀眾仲問我使唔使幫手call消防。我哋唔係高高在上嘅品牌，更加唔係要被崇拜嘅KOL。我哋會喺鏡頭前食住外賣、同大家一齊講笑、討論最近邊套戲好睇，建立嘅唔單止係買賣關係，而係一個有凝聚力嘅『粉絲社群』。另外，所有上架產品，我哋一定親自試過好用先推介。自己唔用、唔食嘅嘢，絕對唔賣 。」

Gucci入貨一擊即中的菠蘿散紙包。

Kit補充：「我哋比較土炮入屋，久唔久有適可而止嘅耍黃腔或講少少粗口，觀眾們都覺得幾有娛樂感。呢個亦係我哋初衷，將歡樂帶畀粉絲。」

至於產品能引起客戶購買慾，靠的是緊貼潮流的眼光。Gucci說：「我一向好鍾意潮流、古靈精怪玩意，有次去韓國旅行，睇中一個菠蘿款式散紙包，覺得客人會鍾意，於是同店家商量入貨，之後返香港做直播，賣咗幾千個。當你成功搵到客人鍾意嘅產品，比起賺錢更有滿足感。」相較Gucci，Kit對潮流就更狂熱，而且更捨得「使錢」。「以前打工搵兩萬蚊一個月，我會留低基本生活費同家用，儲起6千蚊，就係為咗買一條兩萬蚊牛仔褲……」意想不到是，這種潮人特質會成為日後創業本錢。「做任何事，只有真心喜歡，先會成功。如果唔係咁鍾意潮流，就唔會有今日嘅我哋。」

直播背後另有一番辛勞，跟進訂單、客服、物流、包裝環環緊扣。

有苦自己知

另外也曾經歷物流和供應鏈災難。「做代購行業，好多時品牌方出貨或物流上我哋都好難控制。初期訂購量唔夠大，更經常要拆彈，向客人盡力解釋道歉。例如新冠疫情期間，曾有一大批外國搓手液，因供應商延誤，遲咗成個月先到。客人等到好緊張，我哋唯有一邊逐個退錢賠禮道歉，一邊同供應商交涉。嗰次真係好抱歉，因為當刻客人們真係好急住要用。」

Kit說，夫妻創業是完美互補。「老婆係負責幕前嘅靈魂人物，佢天生親和力非常勝任崗位，而我負責公司營運、品牌方接洽、發展自家品牌等。」

創業的代價亦很具體。Kit坦言，創業這條路，外人看來風光，但「有苦自己知」。「基本上冇晒私人時間。人哋放工去玩，我哋就準備開直播、搬貨、包裝，長期每日只瞓 3、4 個鐘。唯一陪阿女嘅時間就係做完通宵朝早返到屋企，送佢搭車返學。少咗時間陪小朋友係最痛心同最大損失。」

為打通供應商門路，更要密密出差「四圍飛」。Gucci說：「今晚8點做完直播就要趕去機場搭凌晨機，去韓國公幹兩星期，與供應商談合作。」Kit補充，供應商網絡是點點滴滴建立：「首爾東大門大部分檔主，我哋都有聯繫，用Wechat同KakaoTalk溝通交流，掌握第一手產品資訊。」

潮人一大特質是去外國定必行到邊買到邊。

難忘竹篙灣做直播

創業路上夫妻共同進退，最難忘是新冠疫情期間，一同入竹篙灣隔離營做直播。Gucci說，當年疫情稍為放緩，第一次放寬出境，她和Kit馬上往韓國入貨，回港後入住檢疫酒店。「我哋帶住大批貨，原本想喺酒店做直播，點知我中咗新冠，要入竹篙灣隔離營。老公擔心我唔識照顧自己，於是飲咗我剩低嗰半支礦泉水，中埋新冠入竹篙灣同我一齊做直播。嗰時我明明就快隔離完可出去，但佢感染咗，令我都要延長隔離，都唔知好嬲定好笑。」

近年零售業疲弱，網購銷情下滑，Kit和Gucci坦言，公司生意難免受影響，不及數年前增長迅速。「生意的確有挑戰、有困難，目前仍在克服中，除做網購，公司正開拓更多業務，如做更多IP產品、活動策劃、品牌設計，甚至去海外做pop up store ，希望增加收入來源，令團隊可以繼續發展。」

去外國入貨，大包細包，親力親為。

創業十多年，由打工仔變老闆，夫妻各有不同體會。Gucci打趣說：「起初創業想喺舖頭睇下韓劇，依家變咗日日做直播，辛苦好多。」Kit則感觸的說，創業最開心不是賺錢，而是能遇上一班好員工。他希望以自身經歷說明天生我才必有用。「我細個唔鍾意讀書，中學時曾俾老師話我係垃圾、廢青，雖然依家唔算好大成就，但我起碼可同老師講，就算係垃圾，我都係一個可回收再造嘅玻璃樽！」

潮店出身　飲水思源

「當年打工，好記得上司同我講：『做得阿頭，就要諗下點樣令員工跟你搵到食。』」Kit說，後來自己創業，常把這句話記在心裡，希望令員工有更多發展機會。目前公司團隊約50人，包括市場推廣、客服、IT、採購、倉務等人員，他稱公司招聘揀人時，相比經驗老手，他更喜歡起用「白紙」。「揀人條件有一個——戇居的事認真做，戇居先有火，就好似周星馳電影咁，可以爆發創造力。年輕人無經驗，反而無包袱可放膽試。」

與員工打拼多年，最深刻這一幕。「公司周年晚宴，同事頒發『今世最佳老闆獎』、『今世最佳老闆娘獎』畀我哋。好感恩，我哋營運到第16年，仍然有一班跟住我哋咁耐嘅戰友，幫我哋睇住公司，我哋先可以向前衝，喺度都想多謝返我哋一班好生性好乖嘅同事。」

飲水思源，夫妻曾在 Catalog工作，特別感激公司栽培。Kit說：「我哋加入公司接受到好好嘅培訓，從銷售、客戶溝通、貨品陳列、店舖管理，都學到好多實戰知識技能，直到現在工作都非常有用。」