香港打工仔每日面對嘅人生難題，除咗「幾時收工」，仲有一句幾乎日日都會聽到：「Lunch食乜好？」
每朝迫車返工、開會、覆email、趕deadline，忙完一輪，好唔容易等到Lunch time，當然都想食餐好嘅慰勞一下自己。始終「辛苦搵嚟志在食」，午餐唔只係醫肚，更係忙碌工作日常之中不可或缺嘅Me time（aka叉電時間）。一餐好食嘅Lunch，足以令人暫時忘記未覆完嘅email，同下晝排住隊等你處理嘅工作。
可惜，諗食乜往往比起諗工作更令人頭痛。公司附近嘅餐廳嚟嚟去去都係嗰幾間，想試新嘢，除咗怕中伏，又怕價錢貴，但冇理由餐餐都食便利店飯糰或者頹飯。為咗解決打工仔「唔知食乜好」嘅世紀難題，我哋即將推出全新企劃《打工仔餓底搵食團》，深入香港不同嘅工商業區，發掘性價比高、值得一食嘅午餐選擇。我哋揀嘅餐廳唔一定要豪華打卡，最緊要係價錢合理、味道OK、份量夠飽、出餐夠快——簡單嚟講，就係打工仔最需要嘅「平、靚、正」！
《打工仔餓底搵食團》第一站將由灣仔出發，灣仔寫字樓林立，橫街窄巷之間亦有唔少隱世食肆，有鑊氣十足嘅小炒、令人大滿足嘅燒味飯，又有充滿地道風味嘅茶記同小店。今次我哋派員親身出動試食，從價錢、味道、份量及出餐速度等等逐一評分，幫打工仔整理一份具性價比又實用嘅午餐指南。
至於有邊幾間餐廳成功吸引到我哋去試？暫時賣個關子先！下期書（9月18日）《打工仔餓底搵食團》灣仔篇（午餐）正式登場，記得留意住Recruit同我哋social media嘅更新喇！