《打工仔餓底搵食團》灣仔篇　竺扶大班燒味：低調實力派　快食、方便穩陣之選| Recruit.com.hk

《打工仔餓底搵食團》灣仔篇　竺扶大班燒味：低調實力派　快食、方便穩陣之選

Post Date: 2026-09-25

有時開完會遲咗出去食晏，又或者有嘢趕緊，想快食夠飽肚又有滿足感，燒味飯係唔少打工仔嘅熱門選擇。「竺扶大班燒味」出餐速度快，無論一個人食定趕時間都好方便。今次試咗招牌黯然銷魂飯同燒鵝拼燒腩仔飯，由厚切半肥瘦叉燒、流心太陽蛋，到油香燒鵝、脆皮燒腩仔，全部都係好啱送飯。1. 黯然銷魂飯($60)：厚切半肥瘦叉燒配流心蛋黯然銷魂飯用上半肥瘦叉燒，切得相當厚身，肥瘦比例啱啱好，望落已經好

Show All

有時開完會遲咗出去食晏，又或者有嘢趕緊，想快食夠飽肚又有滿足感，燒味飯係唔少打工仔嘅熱門選擇。「竺扶大班燒味」出餐速度快，無論一個人食定趕時間都好方便。今次試咗招牌黯然銷魂飯同燒鵝拼燒腩仔飯，由厚切半肥瘦叉燒、流心太陽蛋，到油香燒鵝、脆皮燒腩仔，全部都係好啱送飯。

1. 黯然銷魂飯($60)：厚切半肥瘦叉燒配流心蛋

黯然銷魂飯用上半肥瘦叉燒，切得相當厚身，肥瘦比例啱啱好，望落已經好吸引。叉燒口感豐腴，入口帶油香。成碟飯嘅另一個靈魂，當然係隻流心太陽蛋，蛋白邊位煎香，中間蛋黃保持流心狀態。食之前用筷子篤穿蛋黃再撈落白飯，或者蘸叉燒一齊食，蛋香、叉燒油香同肉汁全部混合，味道同口感都更有層次，亦有儀式感同夠晒邪惡！

2. 燒鵝拼燒腩仔飯($62)：一次過滿足兩個願望

燒味飯識食一定係食雙拼，一嚟食到尾唔會覺得太單調，二嚟可以試多款燒味，你又鍾意點拼？呢碟燒鵝拼燒腩仔亦係竺扶嘅招牌，燒鵝入口帶鵝皮油香，鵝肉嫩滑Juicy，鵝味突出，蘸少少酸梅醬有助中和油膩感，更加醒胃。食燒腩仔最重要嘅一定係塊豬皮，咬落「咔嚓」一聲夠清脆，單係口感已經令人相當滿足。肉質亦嫩口帶鹹香，層次分明，送白飯一流。