
返工返到攰,有時都想暫時放低工作,兼慰勞下自己,咁當然要搵間有格調、有水準嘅餐廳食個靚Lunch啦!今次搵到灣仔鬧市中嘅隱世橫街、咖啡店集中地汕頭街嘅「ZECOND」,餐廳午市Set Lunch每位$138起,不過小編今次想任性啲跟心情Order,所以選擇咗散叫。

1. 醃漬煙燻三文魚NOVA SALMON($98):開胃前菜 配料有心思
煙燻三文魚嘅香氣細緻,油脂感適中,配埋咬落去爆汁嘅三文魚籽,鮮味同鹹味融合,令整體味道更有層次。當中嘅紫洋蔥絲同酸豆,夾埋三文魚片一齊食,清爽又開胃。

2. 海膽醬蟹肉意麵CRABMEAT LINGUINE($158):Al Dente麵質 濃汁掛醬
呢款扁意粉睇賣相都知係走濃郁路線,海膽醬汁濃稠,牢牢掛實每條麵,入口先有奶油香,再帶出海膽嘅甘甜鮮味,蟹肉份量十足,整體有日式西餐Feel;菇菌爽脆,帶嚟多一重口感;扁意粉拿捏出色,夠晒Al Dente。

3. 提拉米蘇TIRAMISU($48):輕盈幼滑 苦甜平衡
食完主菜,都要任性地嗌個甜品慰勞自己!呢度嘅Tiramisu芝士部分幼滑輕盈,入口即溶,甜度亦啱啱好,唔會話甜到膩;而手指餅浸透濃縮咖啡,食到咖啡嘅甘苦同淡淡酒香,配合面層可可粉,苦同甜收尾俐落。鍾意咖啡味甜品、又怕太甜嘅朋友,呢款值得一試。

4. 被香醇熱咖啡淹沒的雪糕AFFOGATO AL CAFFÈ($38):熱咖啡遇上雪糕 冷熱交織
再試埋另一款招牌甜品Affogato,灑上咖啡粉嘅雲呢拿雪糕質地扎實,然後「撞上」香醇熱咖啡,冷熱交織,睇住雪糕慢慢被香醇嘅咖啡「淹沒」已經好療癒!入口咖啡香氣突出,平衡咗雪糕嘅甜膩感,非常之夾,咖啡迷必點!
餓底評價:
如果想用一餐Lunch慰勞自己,或者當日心情想食得講究啲,ZECOND係唔錯選擇!前菜煙燻三文魚清爽又開胃;海膽醬蟹肉意麵扁意粉掛滿汁醬、蟹肉充足,麵質亦做到Al Dente;兩款甜品就各有特色,Tiramisu幼滑輕盈,Affogato冷熱苦甜交織,為午餐增添滿滿幸福感。平日Lunch仲有午市套餐,想控制預算可以睇下Set Lunch,選擇都多元化㗎!
餓底評分:
價錢:★★
味道:★★★★
份量:★★★
出餐速度:★★★★
落單方式:人手落單
支付方式:現金及電子支付
適合:想慰勞自己嘅打工仔、對賣相環境有要求、OL之選
ZECOND
地址:灣仔汕頭街4號廣泰樓地下A2號舖
電話:9263 3516