
由9月開始,《打工仔餓底搵食團》帶大家穿梭灣仔嘅大街小巷,解鎖唔同風格嘅Lunch選擇。嚟到今期,灣仔篇迎來最終回!壓軸登場有老師傅主理嘅傳統點心店,我哋亦特別送上番外篇,介紹兩間適合趕時間、或者想簡單食一餐嘅外賣小店,為灣仔搵食之旅畫上圓滿句號。
Lunch想飲茶歎「一盅兩件」但又唔多人一齊食?不妨考慮下金輝點心茶餐廳,老闆輝哥曾任職昔日灣仔龍門大酒樓,至今仍然堅持傳統手藝製作同即蒸點心,唔係一般預製點心可比㗎!招牌鮮蝦餃皮薄煙韌、蝦肉爽彈;蟹籽燒賣皇以人手剁料,肉香彈牙;另外仲有燒腩卷、雞包仔等買少見少嘅懷舊點心,充滿傳統茶樓風味。
番外篇就為帶大家帶嚟兩間灣仔外賣店,位於藍屋嘅灣仔婆婆早前先開始供應新鮮手作粢飯,大大舊份量十足;新開張冇耐嘅喜承烘焙係間非一般嘅烘焙麵包店,主打嘅杜拜朱古力麻糬、布甸包、牛油年糕都係社交媒體熱捧嘅甜點,同時亦有傳統麵包賣,想買完即走、快速醫肚,又多個貼地選擇。
最後一期同樣附上介紹過嘅灣仔區店舖位置地圖,究竟老師傅手工如何?邊款創意烘焙最有驚喜?粢飯又值唔值得試?即刻拎出手機,掃描頁面上嘅QR Code,解鎖完整食評、必試推介、價錢資訊同味道評分,跟住《打工仔餓底搵食團》完成埋呢趟灣仔搵食之旅!
傳統手藝製作-金輝點心茶餐廳
地址:灣仔春園街10號永興樓地舖
解鎖:https://bit.ly/4i1LgxI
灣仔婆婆
地址:灣仔石水渠街72-74A號地舖
解鎖:https://bit.ly/4hOUazF
喜承烘焙
地址:灣仔灣仔道218-220B號利昌大廈地下A號舖
解鎖:https://bit.ly/4hOUazF