戲裡的龔燁是職場典型「醒目仔」——轉數快、識「執生」、擅「擦鞋」，連哄老婆熊若水都計仔多多。戲外的張景淳卻是個不折不扣的沉實型熟男——愛思考、行事穩陣、享受獨處，連語速也明顯放慢。這種反差不只帶來螢幕火花，更推動他事業靜靜起革命——從歌手起步，轉型演員，再到創業開健身室，翻過高山與彎路，全靠「I人」一種內在力，以慢打快。

如說龔燁這角色是個赤裸裸的「E」人，那真身張景淳就是他一切的相反。不信嗎？且聽本尊親自剖白：「我性格係極度『I』，由細到大好鍾意諗嘢，可以一個人獨處思考好耐……講嘢同表達都偏慢，完全唔似龔燁講嘢快、轉數快、識轉彎。」他緩緩的說。

極「I」與極「E」的人設轉換

扮演劇中角色，「人設」要由極「I」轉換到極「E」，那是如何入戲，演得入型入格？「長期以嚟，當一著起龔燁嗰件鮮藍色西裝、戴上金絲眼鏡，我就會不停提醒自己唔係做緊自己，而係扮演緊佢，講嘢要快啲，神態都要似返個世界仔。當然劇本對白寫得精警，都幫到我好多。」

龔水CP戲裡戲外都非常合拍。

說起龔燁，不得不提熊若水，而飾演角色的呂慧儀，本身就是個爽快俐落的人。自言「有啲笠笠地」的張景淳，跟她做對手戲如何擦出火花？「呂慧儀係好好嘅拍檔，喺做戲方面，我同佢好一致，大家都著重劇本內容，演出時好想hit中劇情重點，而唔太追求個人化表現。另外，佢做嘢好有效率，有時我想預先熱身同佢夾下戲，佢會話：『唔使啦，快啲埋位，即場發揮仲好啦！』結果往往有意想不到嘅即興互動同效果。我從佢身上睇到好多優點，某程度上，我會嘗試adapt to佢嘅做法，佢點去，我就點去，默契就係咁形成。」

劇中龔燁𠱁老婆都計仔多多。

這對螢幕情侶，被粉絲封為「龔水CP」，不少觀眾早已認定他們戲裡戲外都天生一對。張景淳笑言：「咁樣係好事吖，畢竟我哋合作咗9年，如果到咗今日大家仲覺得我哋唔登對，咁就入唔到人心喇。」

當歌手「我的志願」

也多得龔燁這角色，讓他體驗另一種「職涯」和內心世界。「我體會到，出嚟做嘢係要有一種切合工作嘅mode，例如龔燁做marketing，份人多橋、識present、滿足老闆要求，呢啲都係工作需要。有時當我要做類似工作，我會即刻想起龔燁，下一秒就可變返佢。」

話說回來，內向的他，當初為何踏進「外向」的演藝花花世界？張景淳說，入行源於內心對唱歌那份單純的熱愛。他在單親家庭長大，小時媽媽外出打工，而比他大十多歲的哥哥終日約會逛街，他常獨自在家，對著菲傭。「一個人嘅時候，我最鍾意唱歌，但唔太敢喺屋企唱，而係走去公園搵個冇人角落，對住空氣唱。我偏愛唱慢歌，如張國榮《風繼續吹》、劉德華《愛不完》，都係我至愛。」

人生第一個「我的志願」便是當歌手。「有次媽咪問我，大個之後想做咩，我話想做歌手，但諗諗下，覺得歌手唔係咁易做，於是同媽咪講，如果做唔到歌手，就去揸的士，因我認為自己應handle到揸車。」他最終還是選擇歌手這條路。在香港唸完中一後，隨家人移居加拿大。18歲拜師學唱歌，大學一年級時參加《新秀歌唱大賽溫哥華選拔賽》，翌年決定回流香港發展。

張景淳小時常聽哥哥買來的卡式錄音帶，邊聽邊唱。「張國榮、譚詠麟、劉德華的歌都愛唱。」

經歷低谷靜靜應對

入行之路卻非一帆風順。面對顛簸的星途，「I」人沉實的內在，反有一種抗壓「以靜制動」的能耐。當年回港參加坊間歌唱比賽，後來加入演藝公司選拔訓練，並曾在TVB舉辦的《當紅新星升級SHOW》亮相。之後更以音樂組合Cheers出道；可是唱片公司後來因官司問題而停運，導致組合被逼解散。

「當初返香港一心想做歌手，後來真係簽到唱片公司，真係可以歌手身分企喺舞台，真係有機會出唱片……但原來一切可以喺短短幾個月之間歸零，嗰刻真係手足無措，唔知點做……」

張景淳早前在劇中與幾位新世代演員扮演GenZ，完全無違和感。「潮流從來都唔係我嘅嘢，所以呢集有好用力去演，盡量投入呢幾位GenZ嘅energy。」

一夜失去事業舞台、歌手夢碎，他選擇「靜靜」應對。「一個人沉澱落嚟，慢慢就諗通咗，既然做唔返歌手，不如轉跑道做藝員，重頭嚟過。」他之後參加「TVbeople」活動選拔，並成功獲選，從此踏上藝員之路，曾當節目主持、拍劇，但都不太被人留意，浮沉好幾年，甚至捱過月光族日子。「有朋友問我，點解呢幾年冇見我喺幕前出現。其實我一直有拍劇，只係大家冇留意。」直至遇上龔燁角色才真正「入屋」，以「龔水CP」廣吸粉絲。

「曾經完全放棄唱歌。但每次再踏上台演唱都係激動的。」張景淳在Facebook帖文中寫道。

細細個已喜歡畫畫

張景淳自小培養畫畫的興趣。「細個時一個人喺屋企，除咗唱歌，亦好鍾意畫畫，到大個都有繼續畫。」近年曾為社福機構籌款義賣，繪畫3幅不同主題油畫，分別名為《Phoenix》、《Green Canyon》及《It is what you see it is》，各有風格。3幅畫作共籌得逾8千元，幫助復康人士獲得藝術訓練機會。

「I」人的「擇善固執」

入行20年，他學會一件事。「時間會過去，好嘢壞嘢都會過去。正如Tom Hanks講：『good things are gonna pass, bad things are gonna pass』，當遇到唔如意事，要學識接受，之後又會遇到新機會，好似一個循環。正如我由30至35歲，足足5年事業唔太順利，但到咗35歲，我發覺自己仲喺度、冇失敗，而且遇到新角色有更好發揮。」

近兩年事業有新發展，既北上創業開小食店又入股健身室做老闆，拍完劇就親力親為做生意。「 人大咗，經歷多咗，學識居安思危，想有多啲發展。」

「I」人倒不是甚麼也沒所謂，由當歌手、演員，到今天做老闆，他有一個原則，叫做「擇善固執」。「相信自己一定會變得更好，即使眼前未有任何事情發生，但你仍相信佢一定會成真，而且本住呢一份相信，去計劃下一步點做。當日後機會真係嚟到，事情真係改變咗，你就會更識得珍惜同感恩，努力捉緊機會。」

成為健身室老闆，拍完劇要親力親為策劃生意大計。

做健身室生意　源於想「操fit」

他笑言，當初開展健身室生意，源於自己有「操fit」需要。「我一向注重wellness，加上拍《愛回家》有除衫戲要show肌，所以都幾火熱去keep fit，後來更想考牌做健身教練。那時4S Fitness有贊助我做gym，後來與CEO愈傾愈投契，佢就邀請我加盟團隊。」

2026生意和健身大計

說起生意大計，他像變身龔燁，滔滔不絕：「24小時健身室已成為趨勢，雖然未必人人半夜做gym，但可畀大家一個自由嘅選擇，滿足唔同人嘅習慣同需要。我哋會採取穩健做法，一步步嚟，期望每年開2至3間分店，主要選擇屋邨附近開店，營造舒適環境、強化團隊、同當區客戶好好建立關係。健身係個人化服務，要照顧好客戶需要。」

除了拓展生意，他更訂下個人健身大計。「早幾年開小食店，自從做咗飲食業，食多咗，工作又忙咗，自然少咗運動，體重不斷上升，舊年更係我人生最肥一年，雙下巴出晒嚟，所以就決心操返fit，要對得住拍劇上鏡同健身室合夥人形象。」

文：甄榮康