有一份「靠嚇」工作，有彈性、有嘢學，兼可「玩住賺」，更能釋放你技「驚」四座嘅才華。海洋公園「哈囉喂全園祭」今年招募1500名「鬼才」，包括台前幕後工作人員，其中演藝人員逾500人。不論學生、上班族、斜槓族等，都可應徵一試，編寫「暗黑」CV。睇下幾位得獎鬼才現身說法，點解鬼咁鍾意呢份工！

2024年最佳舞台演員　鄧嘉琳（Kitty）：好玩、有錢賺，又有嘢學

我本身係排舞師兼舞蹈員，因男朋友有做哈囉喂演員，所以我想俾個驚喜佢，應徵做嘩鬼。後來我扮女紙紮公仔，佢扮男紙紮公仔，大家相認嗰刻都幾驚喜。做咗哈囉喂4年，我覺得扮鬼最緊要識執生，記得有次訪客同我講，佢上年都有嚟玩，問我認唔認得佢。雖然我唔認得，但靈機一觸、鬼聲鬼氣答佢：「前幾世已見過你，實認得你!」搞到佢笑住驚。呢份工好玩、有錢賺、又有嘢學，最大得著係學識做戲，對我做舞蹈員都有幫助，因跳舞都要「入戲」。

2024年最佳舞台演員　陳詠錀（Alex）：兼職嘩鬼變全職演員

我中學時第一次入場玩哈囉喂，覺得街鬼好有型，於是第二年應徵做演員，之後每年都有參加演出，至今已8年。我細個內向唔多出聲，如果冇扮過鬼，都唔知自己有外向一面，能夠主動嚇人、盡情表演。我曾扮街頭嘩鬼、鬼屋嘩鬼等，最難忘係扮演木偶嘩鬼，要同時操控木偶又要搵時機嚇人，事前都有用心演練驚嚇動作，嚇到訪客嘩嘩聲都好有滿足感，證明付出嘅努力係值得。扮鬼更令我搵到事業方向，兩年前更加入海洋公園擔任全職演員，可更享受表演工作帶來嘅滿足感。

2024年最佳鬼屋演員　鍾欣彤（Gill）：享受齊心完show感覺

我細細個已充滿表演慾，讀書時有玩戲劇，去年畢業第一次做嘩鬼演員，扮演一隻發癲爛賭鬼，真係好有難度同挑戰性，幸好表演導師教我發揮想像力代入角色，聯想人性貪婪同瘋狂一面，再構思驚嚇動作及表情，最後演得入型入格，成功嚇到訪客鬼咁驚。我覺得扮鬼最開心係每日都一大班人齊心完成一個演出嘅感覺。我哋成班嘩鬼放工更會一齊食宵夜。扮鬼扮到可以識到一班「鬼才」，真係一個好正嘅經歷。

2024年表演導師　郭穎東（Rex）：面試最緊要夠膽試

哈囉喂有好多演藝崗位，如鬼屋驚嚇員、特技滑行員、氣氛演員、舞台演員等，無論你個性外向或內向，以至任何外型，都可應徵，發掘你嘅潛藏鬼才。導師會幫你度身訂造角色，提供唔同培訓，包括演戲、跳舞、安全意識等，將你嘅驚嚇潛能發揮到極致。面試有不同環節，例如：自我介紹、角色扮演、跳舞等，應徵者最緊要夠膽試，即使係你唔擅長嘅項目，都應該盡力表現自己，展現對表演嘅熱誠，都可以成功入選。

打開命運　全城招魂　Unlock Your Destiny