人到了30歲的關口，難免會「思前想後」，阮嘉敏亦不例外，但她愈想卻愈是困乏，感到難堪。

「30歲嘅時候，曾有段日子過得好唔開心，亦唔鍾意自己，甚至睇唔起自己。」

大學做過兼職模特兒，後來選港姐入行，曾當《東張西望》主持而獲封「東張女神」，但原來「女神」內心世界並不如外人所想般耀眼強大。「覺得自己好軟弱，冇主見，小小嘅問題都唔識解決。所以好想改變，變出一個全新嘅自己。」為打破故我的框框，她用盡10年積蓄創業，一頭栽進商業戰場，一路跌跌碰碰，捱過一關又一關，幾年下來，終於變出新的模樣。

「而家唔同啦，我完全ok呀，覺得自己叻咗又自信咗，而且學識鍾意自己。」如今變身事業型女神，演藝與生意雙線發展，即將參加《女神配對計劃2》的她，笑言擇偶多了一項條件：「我鍾意男仔上進，搵多搵少唔緊要，最緊要上進。」

常言「三十而立」，她卻面對「三十困惑」。阮嘉敏坦言，早幾年步入30歲，人生彷彿卡在一道無形的關口，不上不下。「其實冇遇到咩大件事，亦講唔上係低谷，只係好多事接二連三發生：同男朋友分手、工作唔順利、連最好嘅朋友都漸行漸遠。有兩三個月，我成日瞓醒就喊，冇動力做任何事。直到有一日，我望住塊鏡問自己：『阮嘉敏，做咗30年人，你有冇一樣嘢係做得好㗎？』」

答案竟然是「冇」。她苦笑說，那一刻的空虛感，前所未有。

「媽咪推家用」的挫敗感

心裡難受的感覺，亦源於一種無形的壓力與比較。「好多舊同學，無論教琴、做地產都做得好成功，成家立室、有車有樓。」而壓垮她自信的最後一根稻草，竟是媽媽拒收家用。「有次我畀家用，媽咪話：『唔使啦，你留返自己用啦。』我知道媽咪係擔心我，但那一刻我好難受，覺得自己已經咁大個人，仲要屋企人操心，冇盡到做仔女嘅責任。」

阮嘉敏說，當初決定做代餐生意沒人看好，她只膽粗粗去試去做。「其實挑戰都幾大，但唔試過、辛苦過，又點知自己唔得呢？！」

那一刻，她嘗試回望，反思30年人生。她坦言：「我係家中細女，由細到大都冇咩壓力，爸媽好錫我。而大我6歲嘅哥哥就好聰明能幹，做乜都叻過我好多。我遇到問題，慣咗打電話問阿哥，連買衫顏色都要佢幫手揀。久而久之，我對好多事情都冇自己嘅想法，遇到難題就特別脆弱。」

豁出去：跳出舒適圈

忽然間，心裡有股衝動，想「狠狠地」改變：「我唔要再咁樣落去！」但改變的方法，身邊人人都意想不到——創業。「我要跳出comfort zone，學識點樣解決問題，同時可以賺錢支持自己演戲嘅夢想，最好嘅方法就係去創業闖一闖。」 黎明的金句都成為她的推動力：「如果你想做一件事，又冇傷天害理，點解唔做？」

她決定用10年積蓄，開創代餐品牌MANCY（取自她Mandy與哥哥Cyrus的名字）。「身邊朋友都想瘦身、追求健康，代餐有市場，但我完全冇生意經驗。好多人勸我『穩陣啲』，話一個人好難成功，但我冇理咁多，膽粗粗就去衝，而且唔借銀行錢、唔靠家人幫忙，就係想逼自己成長。」

創業8個月「零收入」

現實卻比想像殘酷。她帶著配方師到歐美尋找生產商，但都研發不到合適的味道，足足花了8個月毫無進展「零收入」，後來轉到韓國生產才成功。「我資金少，只可做一隻味。期間要維持拍劇工作，早上拍完劇，晚上就飛韓國，同廠商處理生產問題，然後即刻飛返香港，一早落機再趕去拍劇。」

產品終於做出來後，已答應合作的批發商卻突然撻訂，3千罐代餐粉堆在貨倉。「嗰刻真係好慌，唯有不停打電話四處求救。」後來透過朋友介紹，幾經轉折，接觸到一位代購平台老闆。「對方一向跟大品牌合作，而我係細品牌，連直播出場費都唔夠畀。好在老闆好好人，用1個半小時聽我講創業理念，之後答應同我合作。」

阮嘉敏參加創業市集，推廣品牌產品。

這樣誤打誤撞，竟給她殺出條血路。「之前一心想搵批發商合作，而家我定期去平台做直播，就可接觸到買家，之後安排物流商出貨，都可用一部手機搞掂。我有時趁拍劇空檔，按幾下手機就可處理訂單。」

做生意問題天天都多

「不過，做生意真係問題天天都多，咩離奇古怪事都會遇到！每朝瞓醒都有問題飛埋嚟。」有次準備出貨，但600個代餐杯竟在貨倉不翼而飛。「突然唔見咗600個杯，都冇時間諗點解，只不停想辦法解決，例如搵生產商幫手臨時做過，最後用貴啲價錢買到現成貨交畀客，先過到關。」也試過親身做客服接電話，被客戶大罵。「客人將代餐粉同奶放入代餐杯，之後想搖勻，但冇擰實杯蓋，令代餐濺晒出嚟，整污糟咗啲衫，於是好嬲咁鬧我，點解冇說明要擰實杯蓋。我不停道歉講對唔住，後來客人知道我本人就係客服，先至冇咁勞氣。」

比賺錢更開心的事

經兩年努力，生意在2024年漸上軌道。比起賺錢，更令她開心是自己的轉變。「以前遇到問題，我會驚、會閃。但經歷創業呢幾年，我學識面對問題。其實有問題並唔係壞事，與其逃避或者發脾氣，不如快啲諗辦法解決，當成功解決後，個人就會變得愈嚟愈叻。媽咪、阿哥、好友蔣祖曼都話，我自信咗、成熟咗好多。最開心係，而家每個月畀家用媽咪，佢會好開心咁收。」

創業要事事親力親為，包括通宵執貨。

她強調，創業從未取代演戲夢想：「 我始終想做一個好演員，演藝事業需要時間累積，創業可支持我繼續追夢。」

對於做生意，她還有個遠大心願。「哥哥做金融業，專幫企業做IPO。我想，如果有一日生意能愈做愈大，可以搵哥哥幫手搞上市，你話幾好呢。」

現在每朝望著鏡子，她會微笑對自己說：「依家ok呀，我鍾意現在嘅阮嘉敏。」

宅女女神想拍拖

2016年參選港姐入行、曾被封「東張女神」的阮嘉敏，私下其實是個極宅的女生。平日拍完劇多數回家做家務、洗碗、玩籃球機、砌Lego，甚至同公仔傾偈。她笑言自己不愛行街shopping，生活習慣慳家：「我會去茶餐廳食晏，又或買兩餸飯。今朝早餐貴少少，用25蚊買咗個牛角包。」

曾拍過4次拖，約1年半前與男友分手，目前單身。「其實我係想再拍拖嘅，但可能我份人好宅，好難識到人。媽咪同阿嫂就比較心急，成日問我（感情）有冇進展。」

如今變身事業型女神，演藝與生意雙線發展。即將參加《女神配對計劃2》的她，期望另一半有甚麼條件？她笑言：「我鍾意男仔上進，搵多搵少唔緊要，最緊要上進。 」

文：甄榮康